香港人去日本,去到「返鄉下」咁滯,一年唔去返幾次都唔安樂。日本乜都有,但去日本就要面對三大不足 - 胃口不足,睡眠不足,銀彈不足,皆因日本美食多,風景靚,貨品質素高,實在令人百去不厭。
「激安の両替」除咗為客人提供具競爭力嘅匯率,喺銀彈方面協助客人血拼之外,亦會同大家分享吓旅遊有關嘅各種小貼士,希望客人喺「三大不足」制肘下,依然可以玩得盡興,食得開心,瞓得舒適。
雖然主打日本,我哋亦有提供其他港人熱門旅遊國家嘅貨幣兌換及其他服務,例如硬幣兌換,外遊數據 SIM 卡,交通儲值卡發售。

 

 

​本店の物語

每年平均去日本不下十次,護照貼咗N張日本「上陸許可」貼紙,發覺無論喺日本去到幾深入幾偏僻,都會聽到熟悉嘅廣東話,就知道香港人「返鄉下」有幾熱衷,於是萌生創立一間針對外遊,尤其係日本旅遊嘅找換店,希望能夠為同路旅人解決各種外遊所需。

 

任何創業過程都難免一波三折,問題多多,次次新奇款款刺激,小店亦都無法逃離呢個創業宿命。但 2019 年,我哋嘅家 - 香港嘅社會情況特別嚴峻,令我哋發現一直以來習以為常的事情,例如家庭和睦、一家人齊齊整整、社會穩定、法治昌明、安居樂業等等,原來並唔係理所當然;亦令我哋明白每個人生命中,最重要嘅往往其實係無形嘅事物,金錢買唔到嘅嘢,但正正就係因為係無形,有人拼命捍衛嘅同時,亦有人唔明白點解要為無形嘅事物作出犧牲。

 

我哋明白能夠去旅行其實係一種福份。要去陌生嘅新地方旅行,「空閒時間、健康身心、冒險精神、充裕旅費、坐言起行」,五大元素缺一不可。而鍾意去旅行嘅人會深明唔同旅程,都係一種無形嘅寶貴經歷。

 

「生於亂世,有種責任」。小店創立於動盪時,過程感慨良多,亦令我哋感覺到需要為我哋嘅家承擔本業以外更多責任。每一個人,都會喺某一啲方面,例如膚色或種族,又或者因為某啲原因,例如疾病或意外,而令佢成為社會上嘅弱勢社群。而弱勢社群未必一定代表係少數, 喺一幅高牆前,再多嘅雞蛋都唔會令雞蛋脫離弱勢。基於呢個理念,我哋會取之社會用之社會,透過定期捐助支援弱勢社群嘅機構或對社會有正面影響嘅團隊,希望俾佢哋知道,佢哋嘅理念同埋行動係得到別人嘅支持同鼓勵。

 

激安の両替嘅 Logo 係一個菩提達摩,達摩喺日本通常係以不倒翁嘅形象示人,意味經過苦難仍然永不放棄,係祈願同埋擺設嘅吉祥物。許願嘅時候幫達摩嘅左眼點睛,喺一年後或者願望達成時,就將右眼點睛還願。我哋希望不論係我哋小店定係香港,經過重重難關之後,都能夠好似鳳凰一樣浴火重生。

 

© 2020 donkifx.com

Email: hello@donkifx.com
MSO License No. 19-08-02829

  • Facebook Social Icon
  • Instagram