• 激安の両替 DonkiFX

澳洲森林大火緊急籌款 - 拯救野生動物

更新日期:1月 7


Image Credit: Cuson Lo

今個月嘅捐款對象係澳洲嘅野生動物拯救組織 WIRES Wildlife Rescue,為遠在南半球澳洲受森林大火影響袋鼠、樹熊以及其他野生動物出一分力。


樹熊鍾意嘅尤加利樹,樹葉入面蘊含嘅樹油其實好惹火,啲樹葉樹皮跌晒落地已經係森林大火嘅計時炸彈,而當啲樹油蒸發咗,就等於易燃液體變成易燃氣體,著火風險大增。悉尼市郊著名景點「藍山」(Blue Mountain) 之所以叫做藍山,就係源自呢啲尤加利樹油蒸發咗嘅油氣,連同大氣中嘅塵埃同水氣,喺陽光照射下形成一層藍色薄霧。當遇著夏天氣溫炎熱空氣又乾燥,就好容易著火。換句話講,其實澳洲夏天有森林大火唔算得上係新聞,只係每隔幾年就會有一單特別嚴重。


有專家認為森林大火係自然嘅一部份,因為罪魁禍首尤加利樹其實係既得利益者,大火會摧毀其他競爭嘅植物,而尤加利樹嘅種子會喺大火中破殼而出,喺肥沃嘅灰燼上面快速生長「搶地盤」。另外亦有專家發現某啲雀鳥會為咗捕捉食物而「放火」,所以澳洲嘅森林大火唔一定係人為導致。


大自然中各種生物都有佢嘅「搵食方法」,咁我哋人類又係咪應該因為森林大火係「自然」嘅一部分而袖手旁觀,默默睇住 5 億野生動物燒死呢?


大自然其實唔會好似人類咁主觀分為「好」或者「唔好」,只會分為「work」 或者「唔 work」,唔 work 嘅就會好殘酷咁隨時間被淘汰,應驗咗進化論「物競天擇,適者生存」。人類嘅智慧齒亦係一個好例子,原始時代冇咩工具乜都要用牙咬,又冇牙科護理,咬崩咬爛甩咁幾隻牙唔出奇,有智慧齒嘅人就好似有多隻後備牙齒咁,「優勝」過冇智慧齒嘅人,咬到食到自然生存到,冇牙食唔到就只有等死,久而久之有智慧齒遺傳基因嘅人就會佔多數;嚟到現代,有工具處理過晒啲食物,又有牙科護理,有正常清潔打理基本上都唔會有咩牙齒大問題,反而智慧齒就經常變成問題嘅根源,咁嘅情況下冇智慧齒又似乎較「優勝」,但當然以現代人類文明,唔會再發生「有」或者「冇」智慧齒而被淘汰。


人類稱得上係「文明生物」,意思就係跳脫咗「物競天擇,適者生存」嘅層次,我哋唔會餓狗搶食,我哋會識得易地而處,會為他人著想,會考慮長遠顧及大局,學識協調忍讓,建立每人均需信守嘅制度而提升整體利益。所以我哋人類喺必要時會干涉大自然法則,嘗試以有限嘅力量,控制森林大火火勢,拯救受傷及飢渴嘅袋鼠樹熊。可惜人類日常生活整體上雖然稱得上係文明,但思想上仍有一定比例跳脫唔到生物原始獸性,利益以個人及即時為依歸,只顧自己嘅收成,鬧人哋毀掉上一輩努力,但睇唔到自己為咗一己私利而出賣他人,透支未來,搞到下一輩肯努力都冇用,應有回報都俾上一代蠶食晒。


有興趣捐助 WIRES 救救樹熊袋鼠嘅朋友,可以去以下網址睇睇:


WIRES 緊急籌款

https://www.wires.org.au/blog/emergency-donations-to-help-wildlife


#PrayForAustralia



© 2020 donkifx.com

Email: hello@donkifx.com
MSO License No. 19-08-02829

  • Facebook Social Icon
  • Instagram