九年前嘅今日，小編正喺度預備出發去日本，展開為期一個月嘅縱橫全日本之旅。
而就喺出發前 4 日，日本就發生咗東北大地震，緊隨而嚟嘅海嘯、核電廠災難，相信呢啲畫面，過咗咁多年都依然歷歷在目。從果刻開始，日本東北，尤其係福島縣，已經變得不再一樣。
平時去旅行，除咗去其他國家身處唔同地方之外，我哋冇為意到其實亦係一次時光之旅。只不過呢個時光之旅，唔係由今日前往未來或者重返過去，而係俾未來嘅自己回憶返現在。 好多每日習以為常嘅事物，往往會無聲無色，又或者轟轟烈烈咁樣，從此消失。喺天災頻繁以及人口老化嘅日本，呢個現象尤其明顯。舊地重遊，小至昔日幫襯過嘅餐廳小店可能已經結業，搭過嘅火車鐵路因為颱風大雨損毀或者客量日益減少而廢線; 大至熊本城及首里城，可以分別因為一場地震及火災而嚴重受損，復修工作耗時數以年計，即使修復完成，感覺亦可能今非昔比。
熊本城，攝於熊本大地震前一年
而最近因武漢肺炎疫情，多個國家相繼封關，專家呼籲今年內應避免外遊，能夠再去旅行嘅日子遙遙無期。一個又一個例子，正正提醒我哋無常才是恆常，事物錯過咗就唔會再一樣。所以除咗先苦後甜嘅美德之外，我哋亦要知道一期一會嘅精神，把握機會感受當下，及時行樂，珍惜每一個能夠同家人朋友相聚嘅機會。
就喺今日，希望大家能夠抽空去 www.yahoo.co.jp 搜尋 "3.11"，日本 Yahoo 將會為每個搜尋，捐贈 10 日圓俾東日本大震災災區復興支援計劃。
Search for 3.11 at Yahoo! Japan
小編當年透過團購網配對，捐助 311 東日本大地震災民
而我哋「激安の両替」作為香港人外遊嘅找換店，武漢肺炎疫情對我哋嘅打擊亦十分之大。我哋希望疫情盡快過去，有朝一日，大家能夠除低口罩相見，同我哋講聲「三萬蚊唱円 thx」。